La scena : stanza tinello in casa della suocera di Ambrogio lu sartu. La moglie Concetta cuce. Ambrogio è steso sul divano. Il più piccolo dei figli gioca a tiracordeddra lì accanto.
Ambrogio è stato sfrattato ed è costretto, da molti mesi ormai, a vivere a casa della suocera ," la Tora Bricuena".

1^ scena

Ambrogio Ce se mangia osci?
Concetta Pignata. Pasuli!
Figlia (Pascalina) Na! ntorna pignata osci?!?!
Ambrogio Pasuli cu strumbetti. Percè, c'è ave ospiti osci?
Figlia (Pascalina) Sì! nvitai lu Paolinu, n'amicu miu, ca ete scornusu.
Ambrogio E st'amicu tou ca ete scornusu c'è vole cu mangia?
Pascalina Ta ta ta ta li sofficini... ta ta ta ta la famiglia del sorriso. Perchè.... dietro ogni confezione di sofficini c'è una sorpresa
Ambrogio (alzando la mano con aria di stizza verso la figlia) Va fatica meiu, mangia pane a tradimentu se no mboi deventa la famiglia te le sberle. Famme nu favore; stuta dru diavulu te televisione, ca vu rembambisce
Figlio Ma papà, ave li cartoni, Carletto, li puffi ...
Altra figlia ...e Seilor Mien ....la paladina della giustizia
Ambrogio Scia sciocati a coi mienzu alla strada cu me defrisca nu pocu lu cervellu...

(suonano alla porta)

Concetta Ci ete?!

(posa il cucito ma non si alza)
Postino Posta....na raccomandata
Concetta (rivolta al marito) Azzate ave na raccomandata ca tocca cu firmi.
Ambrogio Fallu cu trasa ca sta me defriscu. E tie (rivolto al figlio che gioca cu lu curuddru) spiccia cu fitti stu curuddru e va scioca nu pocu a campana draffore alla strata.
Concetta Fallu cu trasa, ammienzu a stu sciu?!? Nu mbiti quante scercule ave intru a sta casa, no se spiccia mai!
Ambrogio Lu Paulucciu ete n'amicu miu e non guarda ste cose. Fallu cu trasa te ticu.

(Concetta esce e Ambrogio si lega i lacci delle scarpe)

Ambrogio (parlando da solo) E mo ci sape cè me rivou ntorna: addre citazioni, addre carte bollate, addri ricorsi,la bolletta della luce già me rivau, l'eccedenza te l'acqua cull'aumentu te la spazzatura te lu 95; puru lu conguagliu te lu 96...Ma!!! forzi la Sobaritti?!? Tantu a stu puntu ce me ne futtu!!! (mostra il tavolino con tante carte bollate, fatture e ingiunzioni di pagamento...)
Postino E' permessu?!?
Ambrogio Mpa Paulucciu trasi e no guardare! Vista ete casa te sartu ca fatica ( e si asciuga il sudore della fronte) C'è tieni ntorna pe mie osce?
Postino C'è voi cu aggia!?! La solita robBa. Cambiali scadute, lettere te avvocati. Mettime na firma aqquai (e gli mostra il blocchetto delle raccomandate )
Ambrogio E firmamu, tantu vista ete l' Italia te le carte e te firme.
Postinu Ce boi fasci, cusì gira lu mundu statti comutu Mpa Brogiu, te la mettu quai mparu cu quiddre te ieri; tantu tie non le guardi mancu e poi cerca cu te curi la tiarrea ca te visciu propriu scisu.
Mbrogiu Ma quale tiarrea ; ci te tisse categnu la tiarrea?!
Postinu Mesciu Otellu. Sci cu me mitte li subbratacchi e menzetti e me tisse ca, socrata li tisse,ca tie li ticisti ca non poi faticare ca tieni la tiarrea.
Mbrogiu Tu non sai ca socrama ete na vipera?! e Mesciu Otellu surdu comu na campana e capisce isti pe asti?Sicuru ca no stou bonu; tegnu la piorrea non la tiarrea.
Postinu (facendo finta di capire) AH cu la piorrea! Ma! lassa bau se no lu giru no lu spicciu cchiui

(In quel mentre entra la suocera con la borsa della spesa)

Suocera EH! mpa Paulucciu comu stae la Cumare Vata? no lu cetti nu bicchieri te vinu?!
Mbrogiu (meravigliato) Vinu?! e no discisti ca face male?!
Suocera A tie te face male per la diarrea
Mbrogiu Ma quale tiarrea? Pittecula! Ruvinafamiglie. . giustiziera te li mariti. Via te casa mia!
Suocera Te casa toa? Vista è casa mia e te lu bonanima te marituma. A quintru tie si ospite e l'ospite dopu tre giurni puzza te pesce nfetisciutu. Ave te lu 17 febbraiu 1996 ca............
Mbrogiu Sine ,sine! te lu 17 febbraiu (tici tie) 1996, te quandu me cacciara te casa mia cu lu sfrattu. Ma lu sai, ca sta sistemazione è provvisoria, finu a quandu lu sindacu Prof. Dante Tinbraballe non me tae le case popolari
Suocera Si spetta...le case popolari.Ca mo te cate lu culumbu a mbucca, comu lu postu te precamorti allu cimiteru!
Mbrogiu Si ma sta fiata faticai pe la lista te lu campanaru, me spacciai pe lu sindacu Dante Timbraballe; lu sannui tutti ca li fici propaganda; e poi li battii le mane a mienzu alla chiazza e mo ca vince tocca penza a mie.
Suocera Mo ca vinse lu sindacu te lu campanaru tici tie, te mpizza na cagge e face rivi teveru sulle campanaru te Sulitu,ma sulle pizzu a ddrai ca ave lu parafulmine e tepia puru nu fulmine a tie e a quidru, ca pe moi stati tutti a casa mia.
Mbrogiu Me, mo vanne e fanne cazzettu e lassame cu li pensieri mii.
Suocera Concetta, fiia mia.tamme l'agu grossu, ca iu non bisciu, cusì te iutu nu pocu

(Concetta le dà l'ago grosso e la suocera cuce)
Concetta Na mamma fatica e lassalu stare, ca ave te ieri ca sta ragiona te sulu
Mbrogiu Te ricordi Concetta quandu passau la zingara te la fortuna e no fisci tempu cu piu lu biiettu?
Suocera Cine? dra zingara ca girava cullu organettu e lu pappagallu
Mbrogiu Na ntorna vista! Te dissi cu fasci cazzettu e no te mpizzare sempre comu lu petrosinu te ogni menescia
Concetta Me ! ce centra sta zingara? volivi forsi cu te legga la ventura?
Mbrogiu L'addru giurnu me vinne mente ca alla Masaria te lu Berrine ave ancora la Ntogna Macara
Suocera La soggra te lu Pinu Scansafatiche,cagnata te lu Pici citiporci?!
Mbrogiu Si! ma mo metti na punta retu alla lingua cu dra cusceddra e cusite la vucca invece cu cusi dra camisa. Pe l'anima te li morti ...statte citta!
Pocca, stamatina sci cu lu Pici nivvreccusu, lu cagnatu te lu Tore babalusciu primu cuscinu te lu Pantaleu fischione e secondu te lu Ucciu nivvrecusu
Suocera Matonna te le Grazie cu ci sciu se cocchia! Gesù Giuseppe Santa Madre Maria! Se cullu Zoppu vai a ncapu a l'annu,zoppichi! Comu se tice: vanne cu unu meiu te tie e falli puru le spese.
Mbrogiu (arrabbiato) Ticu iu; mannaggia la miseria nera biscecata; sempre tie a parlare? voi stai nu pocu scitta ca è importante? Sta dicia ca sci alla macara cu me legge la ventura e cu me tica la ragione te tanta sventura (indica le carte bollate)
Suocera La ruvina toa, la sventura comu la chiali tie ete lu sciocu e lu vinu. Tai bivutu la camisa e tai sciocatu puru le mutande. Alla buonanima te marituma li tiscia sempre /"Sparagna la farina quandu la matra è china, ca quandu lu fundu pare a ce serve lu sparagnare?! "Menu male ca ave lu cumpagnamentu miu, se no popvera fiiia mia a ce mane cappau
Mbrogiu Povera fiia soa, povera fiia soa!
Concetta La spicciati cu vu ziccati sempre comu lu cane culla muscia. Se po sapere ce te tisse sta macara?
Mbrogiu Tuttu me ndovinou!Tuttu! Tamme nu bicchieri te vinu, ca te dicu tuttu.
Suocera Percè!? Ce gghiete nu bicchierete vinu; nu microfunu cu cunti?
Mbrogiu Tantu cu bivu; tocca parlu almenu pe mezzora, cu vu spiegu tuttu e me potiane siccare li cannavozzi.
Suocera Li potiane siccare li cannavozzi a lu signorinu. E allora a mie, me piia nu leggeru languorinu. "Mbrogiu Tegnu bisognu te qualche cosa te bonu. OH! la mia, non ete propriu fame, ete spilu te qualche cosa te bonu." Me spira l' alma, eccu!
Concetta Mamma mia ; spicciala cu lu mbeleni. Lassalu stare cu cunta.
Mbrogiu Prima te tuttu me tisse: "Uomo, hai tante peripezie"
Suocera Bella scoperta! Li tisse uomo! No se vite ca si masculu?
Concetta Si! Ma ca tieni tante zie non te lu ndovinou propriu.
Mbrogiu No zie, ma Pe-ri-pe-zie! ca vuole cu dica disavventure,malefortune, (e indica la suocera e le cambiali) e le ndovinou
Suocera (arrabbiata) A quai vole la Madonna te le Grazie, addru ca macara !
Mbrogiu La Madonna te le Grazie! Percè, ce centra?!
Suocera M'ave fare na grazia; cu piiamu na pensione.
Mbrogiu La pensione? E ce piiasti la Matonna pe l' Impissi? E poi ce boi? Non te la fice la mbroia lu Ginu Bascone cu pij lu cumpagnamentu?
Suocera No! Ticu ca a tie te l'hannu dare la pensione. Te pacciu, però.
Concetta Oh mamma mia! Poi tici ca te zicca lu sterecu! E lassalu cu cunta puru tie.
Mbrogiu Me sentu fucare; na chianca a lu core. Vista me face piju velenu comu parlu. Tamme n'addru bicchiere te vinu ca tegnu la piorrea.
Suocera Non ave cchiui; spicciau!
Mbrogiu Ma ce sta dici? Ieri sera avia n'addru buttijone chinu.
Suocera E mo non ave cchiui.
Mbrogiu Timme a ddhru stae, a ddhru lu scundistivu, se no mo smontu la casa, cuccettu cuccettu.
Conceta Se la mamma tice ca spicciau, spicciau!
Suocera Tie sai ca iu su giusta, ticu la verità!
Mbrogiu Ci se vanta te sulu non vale nu pasulu! E poi comu pozzu mangiare li pasuli senza nu bicchiere te vinu cu la sparicina?
Suocera Percè? Ci te tisse ca mangi osci? Hai faticatu cu mangi? Sulu la Concetta ave misu in prova l'abbitu te la donna Rosina. Tie cu la scusa te la tiarrea si statu stisu comu nu salame tuttu osce. Se la matina stai allu caddu, alla menzatia mangi friddu.
Mbrogiu Senti! Mo sai ce fazzu! Mo vau allu stompu e me cconzu nu filuncinu cu la murtatella alla facce toa.
Ieri era 28 no? Te pacasti! Tamme qualche soldu ca mposcia no tegnu na lira.
Suocera Sordi non ave, te osce nnanzi s'ave fare 'conomia; e poi stai a casa mia e a qquai cumandu iu!
Mbrogiu (cantando) Questa è casa mia, qui comando io; voglio sapere chi viene e chi va. Brutta befana; te tissi cu te faci li fatti toi e cu no te mpizzi sempre.
Suocera Ah, si? Me carezzavi ieri sera quandu volivi mille lire cu sciochi li numeri. Quandu lu diavulu te ncarizza l'anima te vole . E tie te mie sordi non hai cchiui, percè sinti nu guai e li guai te la pignata (dice indicandosi) li sape la cucchiara( e mostra la tasca) ca li vota.
Mbrogiu Te chiesi mille lire cu sciocu li numeri ca me tisse la macara: 9,19,29,69,89. Era n'affare. Osci viti ca se li numeri essene, ahhhh!!!!!!!
(si mangia le dita) Non boiu mancu cu pensu.
Suocera Affare, affare. Lu chiama affare puru. L'affare ete ca non sciocasti le mille lire. Sparagna pe la dote te la Nunziatina ca quandu e ccrai vole lu zitu e panni alla una li fasci.
Concetta Me mo vitimu se essene li numeri. (si affaccia alla finestra e chiama i figli in strada) Tora,Nicolinu.. Veniti.. ca iti scire a na parte.. Tora, Nicolinu saliti ca vaggiu mandare a na parte.

(i figli entrano sulla scena)

Concetta Ziccativu pe manu e stati attenti quandu traversati la stramurale 'nanzi alla Ciucciarascena ca iti scire a lu potechinu. Quandu sciati tisciti : Mariu, tisse la mamma cu me scrivi li numeri ca essere a lu lottu. (mentre i figli vanno via) ttaccativu li lazzi! E tie azzate li cazzi. Niculinu.. stusciate lu muccu mpisu.. e no te stusciare a li cazzi novi.. e tie Tora ddra gonna nova comu te l'hai cumbinata? Scia bbeniti fuscendu e no sciocati alla strata se no su gguai.
(prima che i figli vadano via Ambrogio chiama la femmina) Tora!!! Ce furmine cumbinasti a ddri capiddri?
Pâre ca te li nfiettau lu sciacuddhri
Tora Papà, la mota. No ssai ca se usane intrecciati e ingrijati?
Mbrogiu La mota.. la mota... se usa.. Sti fiji te osci non pensane addhru a la mota.
Suocera A qquai tieni ragione. A li tiempi mii quandu lu sciacuddhri te nfiettava li capiddri volia dica ca te volia bene e te portava a casa tanti sordi.
Mbrogiu E no potia venire moi; mesia ca te nfiettava li capiddhri puru a tie, basta ca me portava qualche sordu. (rivolto ai figli) Sciati a lu Mariu .. va.. e tornati moi.. vitimu propriu se essera sti numeri.
Concetta Ma sta macara ce te tisse addhru?
Mbrogiu Prima cu se trasforma comu nu porcu se raccomandau :" Ziccala pe capiddhri la fortuna e non te la fare scappare ca quisti eè lu momentu" . Nzomma! Comu tisce mammata cu li proverbi ntichi "Coji l'acqua quandu chiove"

(ritornano i figli con un biglietto piegato che consegnano al padre)

Nicolino Na, papà , me li tese.
Concetta Na, Nicolinu.. vai tuttu bagnatu.. sta cchiove?
Nicolino No! Lu santinu sta pisciava susu allu balcone e paru paru passai iu te sotta
Suocera No lu perde mai ddhru vizziu. Menu male ca no li scappava qualche addhra cosa se no era capace puru cu te la fazza susu.
Mbrogiu Tamme li cchiali cu leggu stu bijettu. Voju me cacciu propriu sta fissazione (e legge piano) 9..19..29..69.. ( e sempre più piano) 89.
Concetta Matonna mia te l'angeli!!!!
Suocera (facendo il segno della croce) Gesù, Giuseppe, Sant'Anna e Maria!!!! (anche la suocera si alza lasciando il cucito sul divano con l'ago rivolto verso l'alto)
Mbrogiu (arrabbiato e meravigliato e rivolto alla icona della Madonna sulla parete) Matonna mia.... me .... eri fattu.... la grazia.... propriu li numeri.... ca me tese la macara....... essera.... propriu li numeri.... ah!!!!!!!!! Suocera e Concetta (insieme) Mbrogiu! Calmate, calmate ca mo te vene na saietta!!!
Suocera Calmate ca mo te pija na coccia!
Mbrogiu Socra essi te nanzi ali occhi mii. Concettaaaaaa.. stou fiaccu.. sta me sentu fiaccu.. ( e si mette la mano al cuore) Concettaaaa; cacciala te nanzi a li occhi mii.
Suocera Sta bau,sta bau me cangiu cusì vou a messa.
Mbrogiu Vanne brutta pizzoca e raccumandate l'anima. Vanne a ddhru voi ca a qquai te spettu (parlando da solo) Ahhhh.. non sciocai li numeri pe curpa te la socra.... (ripete la frase a catilena più volte come un lamento fino a quando stanco si butta privo di forza sul divano, laddove la suocera aveva posato il cucito. Come si siede urla in maniera disumana)
Mbrogiu Ah! Ah! Ah!
Concetta Calmate Ambrogio, calmate; mo te vene nu fulmine. Non pensare cchiui alli sordi. Li sordi cacciane l'occhi a lu diavulu.
Mbrogiu Ah! Ah! ce me tole..... lu (alzandosi di scatto mostra il sedere)
Ah! me se nfilau l'acu allu.................
Concetta Na!!!!! taveru. Te trasiu la cusceddra ca sta cusia la mamma.

(intanto tutti gli altri accorrono alle grida) Nicolinu Na!!! puru rrugginutu ete......
Mbrogiu Poveru mmie! Poveru mmie! Ah!!!!!!!(gridando) Cchina, Cchina tamme nu bicchiere te vinu cu cumbattu li microbi te lu tetanu.

(entra un'altra figlia con i capelli arruffati e con il bicchiere in mano. Ambrogio si gira di scatto e guardandola meravigliato...)

Mbrogio Ah!!!!!!! Puru a tie lu sciacuddri te nfiettau li capiddri o ete la mota? Ah!!!!!! Ah!!!!!!!!!

(entra la Rata)

Rata Ma ce sta succete! Mesciu mbrogiu percè sta criti comu li pacci?
Concetta Prestu ,chiama aiutu. Li se nfilau la crusceddra (fa segno al sedere) (entra anche don Ciccillo con la donna Rosina sua moglie)
Don Ciccillo CCe successu almenu? Era venutu cu cumpagnu la signora mia cu se prova l'abbitu te li ottu e qquai pare ca è passatu lu striunizzu.
Concetta (mentre Ambrogio si lamenta sempre) Li trasiu l'acu........anculu Don Ciccillo E puru rrugginutu. Mbrogiu tocca te scali li cazzi (la zeta dolce) cu te possu tirare l'acu.
Mbrogiu Ah!!! e comu?
Don Ciccillo Cu la tanaia...basta li ziccu lu culu te l'acu, non lu tou...e l'acu esse fore. Comu quandu tiru li tienti (arricciandosi i baffi)
(Poi rivolto a lu Ntoni) Vanne pijame la tanaia te casa. Viti ca ave na capaseddra cu tutti li fierri.
Mbrogio Cu la tanaia, no, non boiu. Ca cu la tanatia toa me pijai la piorrea. Se vau cu me piju la piorrea puru qquai ........(mostra il sedere)
Don Ciccillo Allora scalate li cazzi ca visciu se riescu cu lu ziccu cu le mane. A qquai l'acu trasiu tuttu ,te capu alli pieti.
Concetta Ca se catiu a corpu mortu.
Don Ciccillo E' cosa grave. A qquai serve l'operazione ca sulu iu possu fare, ma .......... (e fa segno con le mani richiamando l'idea del compenso)
Mbrogio Operazione..Oh sorte mia!!!! A pacamentu...Oh sorte mia!!

(Intanto era rientrata la suocera) Socra Ma ce operazione a pagamentu; ca se rrivi a lu prontu soccorsu te Galatina te lu cacciane francu culla cassamalattia
Mbrogiu Non possu camminare mancu nu mattone ca sveniscu pe lu dolore. Ah!!! E se l'acu camina e me rriva allu core.Ah!!! Mamma mia ce dolore.
Concetta Vo cchiamamu l'ambulanza... li pompieri?
Mbrogiu E ce hannu fare li pompieri? Portame meju n'addru bicchieri te vinu cu cumbattu l'infezione.
Don Ciccillu Giustu..vinu cci vole. Vinu pe lu tottore e anestesia pe lu malatu. Cu na puntura te nestiticu non senti nienti.
Mbrogio Timu, don Ciccillu
Don Ciccillo Timi? e no facisti lu sordato tie?
Mbrogio Si! però puru ca su sartu su allergicu all'acu.
Don Ciccillo Si! non te ndecurare ,usu nu nesteticu bonu, no te proccupare ca non senti mancu la puntura; ete nesteticu allu 5O per centu; vae bbonu cusì?
Mbrogio No! fallu allu centu per centu; anzi allu docentu
Don Ciccillo E cce boi, cu te disceti a l'addru mundu? "Est modus in rebus"
Mbrogiu E cce bole cu dica?
Don Ciccillo Ca lu paziente tocca tegna fiducia e basta.

(Donna Rosina prende i feri da Ntoni che intanto e arrivato sulla scena e li passa al marito sospirando e sussurrando)

Donna Rosina Eccu li fierri! Ma no ssai ca lu nesteticu spicciau? Toi nziddre propriu rimasera.
Don Ciccillo Bastane ..bastane. Mo le llonghimu cu nu picchi te acqua e citta ; poi l'effettu placebu e la finzione....a poche parole.... sistema psicologicu
Donna Rosina (facendo finta di capire) Ahh!!!! Sistema psicologicu.....!
Don Cioccillu Donna Rosì! Prepara lu nesteticu a lu centu pe' centu (le fa l'occhiolino) Sciamu ddrintru
Mbrogiu Stendite su lu iettu e fatte coraggiu. (Dopo qualche secondo si sente un urlo continuo di dolore )Ahhhhhhhh!

(Esce il dottore con in mano una grossa pinza che stringe un ago e con una grossa sega con aria soddisfatta)

Don Ciccillo Ahh! E' fatta!!! L'anesteticu allu centu pe' centu funzionou. Mo sta ddorme comu n'angiolettu.
Concetta Ca se sveniu pe lu dolore!
Socra Donna Rosina! Giaccgè ca moi stai qquai, voi cu te provi l'abbitu.
Donna Rosina Sine! Mo me lu provu moi ca ncora mangiu! Cusì non messe panza... (va a provarsi l'abito. In quel momento entra un figlio tutto vestito Punk con le cuffie della radio all'orecchio ignaro di quello che era successo. Entra proprio dove la donna Rosina si stava svestendo per provare l' abito.
Figlio Ahhhh! Na Mucca pazza..mamma...na vacca pazza te l'Inghilterra
Concetta Cittu..ma ce dici! Ete la Donna Rosina ca tsa se spoja..e no' critare ca sireta sta se riposa.

TERZO ATTO

(Sulla scena il figlio di Ambrogio con alcuni suoi amici stanno provando canti popolari per la recita di fine anno)

Concetta Ma voliti cu la spicciati...stati citti...ma ce sta fasciti.....No' ssai ca sireta no' stae bbonu...scia sciocati ddra fore....
Figlio No' sta sciocamu! Sta mparamu li canti 'ntichi pe la recita te la scola.....(riesce a convincerli di andare via. Sulla scena rimane la suocera e Concetta. Nel silenzio si sente una fisarmonica per la strada. La suocera si affaccia alla finestra)
Suocera Nah!! sta passa la fortuna cu lu pappagallu.
Concetta (gridando) Prestu mamma scindi e pija nu bijettu cu si mpasci cu l' Ambrogiu. (mentre questa sta correndo fuori le grida) e dilli ca serve pe' l'Ambrogiu;;tillilu alla fortuna cu no' sbaja. (Ambrogio svegliato dalle grida delle donne si è ripreso e si trascina dolorante sulla scena tenendosi il sedere. La suocera rientra con un biglietto arrotolato. Rimette i soldi del resto nel seno aspettando la compiacenza di Ambrogio che meravigliato di tanta bontà canta stringendo il biglietto tra le mani)
Mbrogiu Felicità... ete cu fasci viddhru ca te piace.... Felicità. Ete cu no' te cumbatti comu nu mulu...... felicità.... Ete cu no' vivi cu l'acu nculu... felicità ...... felicità.. Felicità.. è mandare a malore soggra e dottore... felicità. Senti nell'aria cè già ndore te sordi e te felicità (e bacia il biglietto)
Concetta (rivolta a sua madre) Ma era vera la zzingara!! e li discisti ca era pe' lu mbrogiu lu bijettu.
Socra Sine! avia na zzingara ca paria na signura e cu nu santantoni te pappagallu e li lu tissi ca nonn'era pe mie ma pe l'Ambrogiu. Me lu tese puru celeste lu bijettu, te masculu.
Mbrogiu Tamme li cchiali mii, meju! (inforca gli occhgiali e legge) "Pianeta della fortuna- Uomo- Dopo un colpo di foretuna mancato per colpa di una donna, andrai sempre più in rovina e morirai a 43 anni tre mesi tre giorni e tre ore"
Concetta Allora tie si nnatu lu..... e sta fasci li 43 anni, anzi li fascisti tre misi a rretu e allora vole dica ca mori tra tre ore? (Ambrogio lascia il biglietto e cade svenuto di nuovo sul cucito di Concetta,riinfilzandosi l'ago. Le donne restano sconcertate sia per la sventura annunciata sia per la disavventura dell'ago.
Suocera (toccandogli il maglione )Ete morbidu stu maglione. E' novu?
Concetta No! E' lavatu cu perlana.... passaparola......

(Il sipario si chiude)

(Si riapre il sipario.Ambrogio si è ripreso,è cosciente e si lamenta)

Mbrogio Maledetta carta....maledetta....maledetta socra..Maledetta (dal taschino tira fuori l'orologio a cipolla e....) Fra due ore su mortu.Chiamatime la narduccia cu contrattu ca voiu lu meiu baulu,dieci corone te gigli bianche
Socra basta cu sta farsa,no mori no,tie stai meiu te mie.Si biancu e russu comu nu piperussu.
Mbrogiu Sparisci perdite te nanzi a li occhi mii.
Concetta Ma tie comu te senti?
Mbrogiu E comu m'aggiu sentire.Fiaccu comu unu ca sta more. Ah ce volia cu me suppu cu nu menzu quintu e cu mangiu nu pezzettu te la putea. E poi volia na municeddra e nu pocu te... ... ... ... ... Almenu all'addru mundu vau binchiatu.
Concetta mamma vanne allu mpa Paulucciu e fa te................... doi pezzetti te la putea te la Cardillena.

(Concetta gli asciuga la fonte con un fazzoletto.Poco dopo gli portano da bere e da mangiare.Lui mangia e beve avidamente)

Paulucciu Però cu dici ca stae propriu moribondu non lu poti propriu dire. Mangia comu nu leone.
Concetta Benetica tinne contru li nfasceni
Mbrogio Li nfasceni alli nfasceni,pensa a stu puntu l'ossigenu. SCia pijatime l'ossigenu te Don Mariu.
Socra Ca se respiri bonu!
Mbrogio Viti ca no capisci e c'è centra ca respiru bonu; a tutti li moribondi se tae l'ossigenu. Ma non fazzu mancu cu siati alla farmacia a st' ora cu scomodati don Mariu. A mie pe' ossigenu me basta lu buttijone te vinu.Portamelu quannanzi ca sta buttija spicciau. AH! defriscu li morticeddri.

(beve l'ultimo sorso e si asciuga i baffi sulla manica)

Concetta Ma lu viziu cu te stusci alle maniche no te lu cacciasti mai mancu a puntu te morte.
Socra Viziu te natura finu alla tomba dura
Mbrogio Citta e va viti quantu vinu rimase sotta la matrabanca
Socra N'addru buttijone. Percè cè boi cu bivi puru viddru osci?
Mbrogio (rivolto a Concetta e bisbigliando) Mettimelu intru a lu baulu pe lu viaggiu. L'asctricu te lu Purgatoriu dicene ca bruscia e allora ogni tantu tocca puru cu me suppu.Poi mettitime puru nu paccu te cafè Lavazza cu me ncuppinu san Pietru cu bisciu se me tae nu postu bonu. Comu se tisce......
Socra Ungi l'assu ca la rota camina. Cè si fessa iata tie............................Pensa cu te fasci l'esame te cuscienza meiu pe li peccati toi..Gesù Giuseppe e Maria...... (e si fa la croce) Voi cu te chiamu Don Pantaleu?
Mbrogio Don Pantaleu? Iu non tegnupeccati.. e poi tie si la pizzoca. Cè aggiu fare iu cu li preti? Scia chiamatime lu totu te lu priore te la confraternita te l'anime sante cu me scocchiu lu postu e poi puru lu Leca ca voiu cu li ticu ce ave scrivere su li manifesti : Ambrogio Coppino all'età di 43 anni 3 mesi e 3 giorni saluta tutti e vi aspetta all'altro mondo. Ah Concetta voiu le....................... e la banda te Suianu.
Socra No se usane cchiui li chiangi morti.All'antica vai. Ave mie,ave la Concetta mia cu te chianga culle core....e sparagnamu puru!
Mbrogiu Vista ete l'ultima volontà,voiu li chiangimorti; me rimane nu quartu d'ora (guarda l'orologio) te vita e pensa allu sparagnu.Fanne meiu cu lassu sistemate le cose, lu testamentu, l'eredità e poi.....
Socra Ma quale eredità ca se apri la vucca te se vitene le ntrame. Iu e la Concetta te pijamme senza la camisa e le mutande.
Mbrogio Poveru,ma onestu e beddru,n'occhiu te fronte te pijasti. Avistu.. avistu....E poi se me se vitene le ntrame avistu ca stau fiaccu..ca su moribondu Tie m'hai portatu alla rruviva. Ma voiu cu su bonu...voiu te lassu la casa propriu a tie. Te lassu ususfruttuaria te tutte le carte mie (e indica le cambiali in protesto e le tasse da pagare.Intanto beve sempre alla bottiglia di vino)

(entrano gli amici e con loro Don Ciccillo il dentista)

D.C. Ma cè sta succede ntorna?
Concetta Ave morire fra 10 minuti
D.C. Percè è malatu te core
Concetta Pesciu! Li lu tisse la furtuna. No se sente cchiui!
D.C. Chiamati lu tottore Saracinu,portatilu allu prontu soccorsu a Lecce
Mbrogiu Senti,senti come batte lentu
D.C. Ma cè cagniu dici Mbrogiu..lu core stae a sinistra e batte bonu..sulu ca vai mbriacu a stozze.Ricordate lu core a sinistra lu fecatu e la bile a destra.

(gli amici hanno capito che Ambrogio è ormai ubriaco)

Mesciu Masi Vistu ca stae menzu brillu ca ormai non se rende contu e ca save fissatu ca ave morire non li potiame fare nu scherzu cu li cacciami sta fissazione.

(chiama la figlia Tora e il figlio più piccolo,alla suocera chiede soldi e parla loro all'orecchio : "Ambrogio ha bevuto ancora; è proprio ubriaco"

Mbrogiu Ih!Ih! (singhiozzando) Fra nu minutu sonane le 10 e addiu addiu Concetta..Addiu fili mi.

(rintoccano le 10 e appare il figlio travestito da sciacuddri che lo soffoca)

Figlio Mbrogiu Mbrogiu suntu lu sciacuddri.Te ricordi ca nfiettava sempre la Tora?
Mbrogiu No me carcare ca perdu te respiru
Figlio T'aggiu portatu sordi (e gli da degli spiccioli) e n'addra macaria

(gli lascia il foglietto e saltando esce discena) (gli buttano un secchio d'acqua. Ambrogio si riprende e si ritrova con il biglietto tra le mani.Chiama la moglie a gran voce.)

Mbrogiu Concetta!Concetta! lu sciacuddri me vole bene, me portau sordi e stu bijettu e me tisse è concessa,è concessa.......

(la moglie apre e legge)

Concetta Ti è concessa la proroga non alle cambiali che pagherai con questi soldi ma alla vita che avrai lunga e vivrai sino all'età di 100 anni

(si alza di scatto dal divano balzando di gioia, mostrandolo a tutti e ballando con tutti. Tutti ballano)

... ... ... ... ... ... ... ... ... ... ... ... ... ... ... ... ... ... ... ... ... ... ... ... ... ...
Voglio una vita spericolata
voglio una vita esagerata
di quelle che no finiscono mai
Ciao mamma guarda come mi diverto
Eh! l'ombellico del mondo
Macarena macarena
Ci vuole un fisico bestiale
Concetta Concetta no,no! io non ti lascio (entrano in scena tutti gli altri attori. Tutti cantano! Si chiude il sipario.